KAMINHADA D ABRIL

“GVS e un grup d bon kunvivensa i abit saudava. Kriod na mors d 2010, el ta bert a partisipason d kin kre sta pert i k intensaun d pasa muments sab (agradava), pa dadj rizada, izersita muskl na kaminhada na ilha ( tud ultm dming d kada mes ) i diskuti temas d antires jeral. Nos limit e nos ben-star i d nos amig.”

Na kaminhada d Oj, dia 29 d abril d 2012, fet  na zona d Madama ( entre riu Madama i riu Murdera ), pa lest d strada Sparg/Santamaria, partisipa 46 kabesa d 8 a 65 on d idad. Na sgunda part, diresaun uferise un KEK d aniversar d grupu, pa refursa merenda/lonx.

Tema d palestra fui anpurtansa d Duasaun d Sang, dod Lu,  teknika d Bonk d Sangna d Uspital d Djadsal. Dpos d alguns sklerasiment, grup kunprumite ser parser d Bonk d Sang (BS). Kada menbr ( kunpetiva ) dibe ser dador i liba, plu mens, 5 ( sink ) psoa pa on pa da sang.

DIA D PRUFSOR KABVERDIANU

Pa selebra Dia d Prufsor Kabverdian (23 d Abril), prufsors d Djadsal ilabura un prugrama kultural i dispurtiv, kunpost pa Gala d Telents d Prufsors, Jantar-Dansant, Pasiata, Jogs, Misa i Xouzia.

Na “Gala d Telents d Prufsors”, realizod na dia 21 d Abril, na Sine-Teatru d ASA-EP, partisipa prufsors d tud sistema d insin (Pre-Skular, Baziku i Skundariu).

Perant serka d uns 400 alma (spetador) d tud idad, akunpanhod pa banda Nelson Évora i triu (Rady, Toi i Steven) d Skola d Muzga Tututa, Elsa, Nanda, Lídia Ramalho, Nélida, Rosa Lopes, Bia Duarte, Ângela, Kátia Mendes, E. Ferreira, Luísa, Paula Soares, Nela, Loid Santiago, Jandira i Tiu Lin (telents d prufsor), brilhanta publiku ku kantigas braziler i kabverdian. So falta un fadu na linga “goltarpianu”!

Nes spetakl, kural d Jardin d greja katolka, koral d Skola-Nova i dupla Moisés i Djila Évora, da xou. Tiu ftxa spetakulu ku xav d diamant.

Na linga maternu, kada gota ta kunta!

Sidad-Stad d Forsaeria, 24 d Abril d 2012.

“ ABITA KAB VERD K DIGNIDAD”

“ ABITA KAB VERD K DIGNIDAD”

Mas un atu d Lasament d Primer Pedra d Prujet  “ Konstrusaun d Abitasãu d Interes Susial “ (“Kaza Pa Nos Tud” ) d Klas ABC, tevi lugar ont 18 d abril d 2012 na Djadsal, pa PM sob UDJAR atent d FORSAS VIVU D SIDADANIA (FVS):

50 kaza na Sidad Munisipiu d Santamaria

54 kasa pa Sidad portuariu d Palmera;

Munisipiu Metropolitanu d Sparg ( Txan d Matias ), 100 Abitasaun ( 60 d klas A i 40 klas B ) i 8 spas kumersial d interes susial. Un investiment d 264.260.168$, pa kunstrui na proz d un on ( 12 mez ), garantindu  80 inpreg diret i 240 indiret pa Giniens, ja k nasiunais ka sta nen li pa trabodj dur i suj. Dipos ta flod na altu taxa d DZENPREG!

Pedra d Lum, fka pa ser brevment ramansod  140 kasa.

Tres Diskursu di Sirkunstansa, na tenp d dzova d vot :

1-Prezident d KMS, Jfigeiredu, k dispunibliza kupera na side mas terren pa prujetu;

2-MAAOT, Anteru Veiga, “Ratu” di Sidadania ( repiskod na ultimu ajust d Guvern d “Nason Vensidor” ), ki promite  po tud si nergia ( eolika i sular ) pa Prujetu ka dirrapa;

3- PM, JMP (edras), ki puetiza Runfna mas 10.000 kasa na se mandatu, pa difinitivament anikila di bes ku barrakas kauberdianu.

Tud anterisod na ten un kaza prop, pude diriji pa Asosiasaun d Txan d Matias, Kanbra Muinisipal, i Kaza d Sidadaun pa infurma u k ten k faze!

Dipos des at di sidadania, sr. JMN duspi se fatu di PM ( kunprod k dnher d kuntribuit ) pa bisti balaika di Paicv, pa faze aprezentason di se kandidatu pa Kanbra Muinisipal di Djadsal, Jova Démis Lobo Almeida. Nes pontu asinha, tudu igual a dismandu di governason Vintuinha.

Sidad-Stadu d Forsaeria, 19 d abril d 2012

 Olisantu Nateliza, militant d sidadania!