KAMINHU
PA FUTURU DI NASON SANVISENTI
Devidu a nhas bons relason ku MOVIMENTU DI SIDADANIA PA REJIONALIZASON
di Sanvisenti, apoiadu pa TROIKA Par(a)lamentar (Paicv, Mpd i
Ucid), na anbitu di 100mania di Joma,
PM di governu di “bon governason” di “republika
di Praia”, N fui indijitadu, na dizenbru di anu pasadu, pa reprezenta Governu di Nason Vensidor juntu
di ALTU KOMISARIADU PA REJIONALIZASON DI SANVISENTI i inplementason di Sidadi Stadu di Mindelu ku
STATU SPESIAL pa Barlaventu (Sintanton, Saniklau, Djadsal,
Bubista, Santaluzia i Djeus).
Nes MISON di SALVASON di Sonsent
(...) ja N faze dois dislokason pa ilha di Cesária (pagu pa
dizenpregadus, reformadus i pensionistas), pa sukuta sentimentu di FORSAS BIBU mindlens (MSR, Sindikatus,
Partidus pulitiku, Jotas, Alfas partidariu, Omgs, Inteletualidadis, Grupus
karnavalesku, Enprezarius, Profisoris, Studantis,
Lisensiadus na dizenpregu, Enpregetis i Diaristas, Relijiozus, Diskotekas, Taksistas, Iasistas, Autokaristas,
Maritimus, Stivadoris, Pexeras i Piskadoris, Karteiristas, Vendedoristas di
balaiu, ...) antis di kalker desizon di TROIKA di “republika di Praia” (Prezidenti, Par(a)lamentu
i Governu). Na agostu prosimu, N tene mas otu pasiata la Mindelu pa
sosializa rezultadu di studu fetu ku Forsas Bibu di Sidadania
(FVS) mindlens, antis di entrega di relatoriu na TROIKA MULTIGATU di
Republika Federadu di Kauberdi. Asin, kalker Tratadu sobri Sanvisenti na PM (Paralamentu
Multigatu), antis di es studu e blablabla!
Moviment d Sidadania pa Rejionalizasaun
(MSR) ta konsient d tentativa d partids
pulitiku (mpd na diantera) di kere toma frenti di luta di sidadania mindlens.
Pa evita k isu akontesi, el sa ta prepara un MEGA MANIFESTASON di repudiu a
kalker tentativa di “GOLPI DI STADU” di Troika di “republika di Praia”, PAPAGAIANDU
un amador di governason lokal di Mindelu (povu teni governu k el meresi!).
Situason kritiku di Sanvisenti e produtu
di “SISTEMA PULITIKU KADUKU OSIDENTAL” inplantadu na
REPUBLIKA FEDERADU
pa “DITADURA DEMOVEIGA”,
fielmenti sigidu pa Jomania , sen opozison di SIDADANIA sklarisidu.
Povu di Kauberdi miste da un
basta a es Sistema di Multigatu na pulitika,
ka vota na ninhun TUBARON BRANKU STRANJEIRADU, k so ta djobe na ses bolsus i na di ses FAMILIAS i AMIGUS.
Enkuantu POVU ta fika ku promesa di kanpanha di dias midjor.
Sima un ot (Biakota) fla, maior disgrasa dun pais pobri e produzi rikus na bazi di korrupison,
lantxas i voadors.
Kuidadu, MSR i Sanvisent! Oji, 27
di maiu di 2013, na par(a)mentu multigatu di Praia, “salvadors di
Sanvisenti” sa ta diskuti novu manera di txupa bos morangu!
Forsa Sanvisenti, badius tanbe
sta ku bo!
BFA di Djadsal, V-9,
27 di maiu di 2013
Olisantu Nateliza –
Kap. Kabala
